நான்காவது குழந்தையும் பெண்ணாகப் பிறந்ததால் நேர்ந்த விபரீதம்

உடற்பயிற்சி

“மனைவி இன்னொரு முறையும் பெண் குழந்தையையே பெற்றெடுத்திருப்பதால், ஏற்பட்ட கவலை இந்த விபரீத முடிவை எடுக்கத் தூண்டியிருக்கிறது” என காவல்துறையினர் தெரிவிக்கின்றனர்.

  • 3 குழந்தைகளுக்குத் தந்தையான சொலங்கி, ஆண் குழந்தை பிறக்கவில்லை என்ற கவலையில் இருந்திருந்திருக்கிறார்.
  • 100 அடி ஆழம் கொண்ட கிணற்றில் குழந்தைகளை வீசிவிட்டு, தூக்கிட்டுத் தற்கொலை செய்துகொண்டிருக்கிறார்.
குஜராத் மாநிலத்தில் ஊர்க்காவல் படை போலீசார் ஒருவர் தனக்குப் பிறந்த நான்காவது குழந்தையும் பெண் குழந்தையாக அமைந்துவிட்டதால், மற்ற மூன்று குழந்தைகளையும் கொன்றுவிட்டு தானும் தற்கொலை செய்துகொண்டிருக்கிறார்.

குஜராத் மாநிலம் ஜூனாகத் மாவட்டத்தில் கம்பாலியா என்ற கிராமத்தைச் சேர்ந்த ராசிக் சொலங்கி என்ற இளைஞருக்கு 10 ஆண்டுகளுக்கு முன் திருமணம் நடந்துள்ளது. 36 வயதான இவர் ஊர்க்காவல் படை காவலராகவும் விவசாயக் கூலித் தொழிலாளியாகவும் பணிபுரிந்துவந்துள்ளார்.

மூன்று குழந்தைகளுக்குத் தந்தையான இவர், ஆண் குழந்தை பிறக்கவில்லை என்ற கவலையில் இருந்திருந்திருக்கிறார். புதன்கிழமை இவர் தனது குழந்தைகள், ரியா (8), அஞ்சலி (7) மற்றும் ஜல்பா (3) ஆகிய மூவரையும் லால்ஜி புவா என்பவருக்குச் சொந்தமான விவசாய நிலத்திற்கு அழைத்துச் சென்றுள்ளார். அங்குள்ள 100 அடி ஆழம் கொண்ட கிணற்றில் மூன்று குழந்தைகளையும் வீசியுள்ளார். பின் தானும் அருகே இருந்த ஒரு மரத்தில் தூக்கிட்டுத் தற்கொலை செய்துகொண்டிருக்கிறார்.

தற்கொலை செய்துகொண்ட சொலங்கி.

இந்தப் பகுதியில் விவசாயப் பணியில் ஈடுபட்டிருந்த ஒருவர் சொலங்கி தூக்கில் தொங்குவதைப் பார்த்துவிட்டு உடனே அவரது அண்ணன் வால்ஜி வீட்டுக்குத் தகவல் சொல்லியிருக்கிறார்.

வால்ஜி தனது தம்பி சொலங்கியின் வீட்டுக்குப் பக்கத்து வீட்டிலேயே வசிக்கிறார். இவர் சொலங்கி பைக்கில் தன் மூன்று குழந்தைகளையும் ஏற்றிக்கொண்டு செல்வதை கவனித்துள்ளார். இதனால் சொலங்கி தூக்கிட்டுக்கொண்ட இடத்துக்குப் பக்கத்தில் இருந்த கிணற்றில் பார்த்தபோது, மூன்று குழந்தைகளும் இறந்து மிதப்பதைக் கண்டு, அவற்றை மீட்டிருக்கிறார்.

“சொலங்கிக்கு ஆண் குழந்தை இல்லையே என்ற குறை இருந்தது. மனைவி இன்னொரு முறையும் பெண் குழந்தையையே பெற்றெடுத்திருப்பதால், ஏற்பட்ட கவலை இந்த விபரீத முடிவை எடுக்கத் தூண்டியிருக்கிறது” என காவல்துறையினர் தெரிவிக்கிறார்.

சொலங்கியின் மனைவி இரண்டு நாட்களுக்கு முன், தனது நான்காவது குழந்தையுடன் ஜூனாகத்தின் விஸ்வதார் என்ற இடத்தில் உள்ள பெற்றோர் வீட்டுக்குச் சென்றிருக்கிறார். வீட்டில் தனியாக இருந்த சொலங்கி விரக்தியில் கொடூர முடிவுக்கு வந்திருக்கிறார். ஏற்கெனவே அவரது குடும்பம் மிகவும் பண நெருக்கடியில் தவித்திருக்கிறது எனவும் போலீசார் கூறுகின்றனர்.

Leave a Reply

Your email address will not be published. Required fields are marked *